Gleðilega páska

Nú er komið að páskafríi eftir þrjár óvenjulegar vikur í skólastarfi og það lítur út fyrir að við séum u.þ.b. hálfnuð í baráttunni við veiruna. Þessar þrjár vikur hafa gengið einstaklega vel hér í skólanum og við höfum náð að halda uppi því kennslumagni sem við lögðum upp með.

Almennt eru kennarar að halda áætlun í öllum grunnfögum, það er vel að verki staðið. Við biðjum foreldra þeirra barna sem hafa verið í sóttkví eða ekki mætti í skólann þessar vikur að sjá til þess að börnin haldi áætlun bekkjarins því við munum ekki bakka í námsefninu þegar þetta verður allt gengið yfir. Ef þau eru orðin á eftir þá þarf að nýta páskaleyfið til að ná bekkjarfélögunum. 

Við þurfum að gera breytingar eftir páska og minnka kennslumagn hjá árgöngum í 1. -6.bekk. Við ætlum að halda óbreyttri dagskrá hjá 7.-10.bekk nema að eitthvað óvænt komi upp á.

Kennsla árganga verður eftirfarandi:
1.-3. bekk verða 3. klst. á viku eða 22,5 kennslustundir á viku. Við styttum útiveru í 30 mínútur á dag.
4.-6. bekk verður 2,5 klst. á dag eða 18,8 kennslustundir á vikum. Við sleppum útiveru.
Sælukot verður opið til 16:00. Einn hópur verður til 15:45 en sá hópur mætir 15 mínútum fyrr á daginn.

Samkvæmt tilmælum frá almannavörnum er starfsfólk skóla beðið um að forðast eins og hægt er að breyta nemendahópum eftir páska.

Þegar við erum öll að stefna í sömu átt þá lyftum við grettistaki. Farið varlega, gefið engan slaka á þeim reglum sem við höfum öll verið fylgja.

Gleðilega páska öll sömul, að þessu sinni vona ég að þið haldið ykkur heima og hlýðið Víði, það borgar sig.